Արցախի շրջափակման պատճառով առաջացած խնդիրներն ու սահմանափակումներն ուղղակիորեն ազդել են նաև սպորտի բնագավառի վրա։  Անհամեմատ նվազել է տեղական մարզական միջոցառումների թիվը, անհնարին է դարձել արտերկրում կայանալիք մրցաշարերին մեր մարզիկների մասնակցությունը։

2023 թվականի 1-ին կիսամյակում արցախցի մարզիկները մասնակցել  են ինչպես Արցախում կազմակերպված մրցաշարերին, այնպես էլ ՀՀ-ի, միջազգային և Եվրոպայի առաջնություններին: ԱՀ ԿԳՄՍ նախարարության սպորտի վարչության և հանրապետությունում գործող ֆեդերացիաների կողմից անցած ամիսներին անց է կացվել թվով 13 տեղական մարզական միջոցառում, որոնց 1105 մարզիկ է  մասնակցել։

Արցախից 5 մարզիկ մասնակցել է Եվրոպայի առաջնություններին՝ նվաճելով մեկ ոսկե և մեկ բրոնզե մեդալ։

Միջազգային մրցաշարերի մասնակից 6 մարզիկներից մեկը արծաթե մեդալով է վերադարձել։  

Արցախից 7 մարզիկ մասնակցել է  Հայաստանի Հանրապետությունում կազմակերպված 5 մարզական միջոցառումների։ Նրանցից 4-ը գրավել է առաջին, 2-ը՝ երրորդ տեղ։

Ընդհանուր առմամբ՝ 18 մարզիկ մասնակցել է ՀՀ, Եվրոպայի և միջազգային մրցաշարերին՝ գրավելով 5 առաջին, 1  երկրորդ և 3 երրորդ մրցանակային տեղեր:

5 մարզիկ նախորդ 6 ամսվա ընթացքում մասնակցել է ՀՀ ուսումնամարզական հավաքների, 2 մարզիչ Իսրայելի Հայֆա քաղաքում  մասնակցել է սամբոյի մրցավարական սեմինար-պարապմունքներին:

Ադրբեջանի կողմից Արցախի շրջափակման պատճառով ՀՀ առաջություններին և միջազգային մրցումներին մասնակցելու հնարավորություն են   ունեցել միայն այն մարզիկները, որոնք ստեղծված իրավիճակով պայմանավորված՝ ժամանակավորապես գտնվում են   Հայաստանի Հանրապետությունում։

     2023թ․ առաջին կիսամյակի ընթացքում լավագույն արդյունքներ են ցուցաբերել  Արման Ավանեսյանը (1-ին տեղ, մարտական սամբոյի Եվրոպայի առաջնություն, 98կգ քաշային կարգ, ապրիլի 14-ից 26-ը, Իսրայել, ք․Հայֆա) և Էրիկ Առստամյանը (3-րդ տեղ, երիտասարդների բռնցքամարտի Եվրոպայի առաջնություն, ապրիլի 23-ից մայիսի 4-ը, ՀՀ, ք․Երևան)։