ԱՀ ԿԳՄՍ նախարարության նախադպրոցական կրթության բաժնի  նախաձեռնությամբ ու Ստեփանակերտի հանրակրթական դպրոցներին կից գործող նախադպրոցական խմբերի սաների մասնակցությամբ հունիսի 1-ին, Ստեփանակերտի մշակույթի և երիտասարդության պալատի դահլիճում կայացավ  տոնական համերգ՝ նվիրված Երեխաների  պաշտպանության միջազգային օրվան:

Բեմում փայլում էին երեխաները՝ երգում, պարում , արտասանում, սեր էին խոստովանում հայրենիքին ու մայրիկներին, խաղաղության ու համերաշխության  ուղերձ հղում աշխարհին: Թոթովախոս փոքրիկներին հաջողվեց օրը տոն դարձնել ինչպես իրենց, այնպես էլ մեծերի համար: 

Ժամեր անց, նույն դահլիճում կրկին ուրախ տրամադրություն էր: Այս անգամ տոնական համերգի նախաձեռնությունը «Արցախյան երրորդ պատերազմում զոհված և անհայտ կորած զինծառայողների հարազատների միություն »  ՀԿ էր՝ ԱՀ ԿԳՄՍ նախարարության աջակցությամբ:

Փոքրիկ հանդիսատեսի համար ելույթ ունեցան  «Արցախի ձայն » նախագծի  երգիչները և Ստեփանակերտի Հակոբ Գյուրջյանի անվան արվեստի դպրոցի կրտսեր խմբի սաները:

Իսկ երեկոյան Ստեփանակերտի Վերածննդի հրապարակն էր իր գիրկն առել օրվա հերոսներին՝ մեծ երազանքներով փոքրիկ արցախցիներին: Համերգային շոու-ծրագիրը կազմակերպվել էր ԱՀ ԿԳՄՍ նախարարության կողմից:

Թող մեր մանուկները վայելեն խաղաղ ու անհոգ մանկություն: