Այսօր՝ մարտի 16-ին, Ստեփանակերտի մշակույթի և երիտասարդության պալատի ցուցասրահում տեղի է ունեցել Մայրության և գեղեցկության օրվան նվիրված ձեռքի աշխատանքների ցուցահանդես-մրցույթ։

Արցախի Հանրապետության ԿԳՄՍ նախարարության արտադպրոցական ծրագրերի  բաժնի կողմից կազմակերպված ամենամյա ցուցահանդես-մրցույթին Արցախի  6 մանակապատանեկան ստեղծագործական կենտրոնները մասնակցել են նոր աշխատանքներով, որոնցում գարունն է, մայրը, հայրենիքը։  Ցուցահանդես-մրցույթի նպատակը մանկապատանեկան ստեղծագործական կենտրոնների աշակերտների գեղագիտական դաստիարակությանն ու ստեղծագործական ունակությունների զարգացմանը նպաստելն է:

 Տաղավարներում ներկայացված էին գորգագործություն, գոբելեն, խեցեգործություն, հուլունքագործություն, նկարչություն, քանդակ և այլն։ «Ուրախալի է, որ նաև շրջանների ստեղծագործական կենտրոնների սաներն են ամեն տարի ակտիվ մասնակցում մրցույթին, նույնիսկ այն շրջանների, որոնք այսօր գտնվում են Ադրբեջանի վերահսկողության տակ։ Մենք պարտավոր ենք գնահատել և խրախուսել նրանց  մասնակցությունը»,- ասում է ԱՀ ԿԳՄՍ նախարարության արտադպրոցական ծրագրերի բաժնի վարիչ Արմեն Պետրոսյանը։

Մարտակերտի մանկապատանեկան ստեղծագործական կենտրոնը ցուցահանդես-մրցույթին մասնակցել է 23 գործով։ Կենտրոնի տնօրեն Ռիմա Իզմայիլյանի խոսքով՝ անգամ շրջափակման պայմաններում ստեղծագործական կենտրոնի խմբակավարներն ու սաները ջանք ու եռանդ չեն խնայում, ունեցած նյութերը փորձում են խնայողաբար օգտագործել, սիրով մասնակցում են  կազմակերպվող բոլոր ցուցահանդեսներին և մրցույթներին։

Մասնակիցները հյուրերի համար նաև մշակութային համարներ էին պատրաստել։

Միջոցառման հանձնաժողովի անդամները քննարկման արդյունքում առաջին մրցանակային տեղը շնորհել են Ասկերանի շրջանի մանկապատանեկան ստեղծագործական կենտրոնին, երկրորդ տեղում Ստեփանակերտի ՄՊՍԿ-ն է, իսկ երրորդ տեղը զբաղեցրել է Մարտակերտի մանկապատանեկան ստեղծագործական կենտրոնը։

Լավագույնը ճանաչված մանկապատանեկան ստեղծագործական կենտրոնները պարգևատրվել են ԱՀ ԿԳՄՍ նախարարության դիպլոմներով և խրախուսական նվերներով։