«Ամանորի շնորհավորանքի փոխարեն այս դժվարին ու անորոշ օրերին ուզում եմ խոսքս որպես պատգամ հնչի՝ հավատի, հույսի ու տոկունության…

Այսպիսի օրեր միասին շատ ենք հաղթահարել ու գիտենք՝ դրանք անցողիկ են, իսկ հայը՝ հարատև՝ իր հազարամյա ամուր հավատով, պայքարի աննկուն ոգով ու անկոտրում կամքով:

Գիտենք նաև, որ այսպիսի դժվարություններն ավելի կոփում ու տոկուն են դարձնում մարդուն, հենց այսպիսի պահերն են համախմբում ու միասնական դարձնում, ուժ ու ամուր կամք տալիս: Մեր հարատևության արմատներն այսպես են ծլարձակում…

Մենք հավատում ենք, որ կրթությունն է այն փարոսը, որ աշխարհը դարձնում է ավելի լավը, մեր հայրենիքը՝ խաղաղ, մարդկանց՝ մարդասեր, կյանքը՝ առողջ ու ապրեցնող:

Մենք հավատում ենք նաև, որ Արցախում կարող ենք համախմբել բոլորին՝ աշակերտներին ու ծնողներին, կրթության բոլոր ջատագովներին մեկ ընդհանուր գաղափարի շուրջ, սովորել միասին ու միմյանցից, ապրել ու թևավորվել մեկս մյուսով:

Այդ հավատով ու վստահությամբ այս ուսումնական տարին Արցախի հետ սկսեցինք. հավատում ենք՝ միասնականությամբ ու միահամուռ ուժերով Արցախը, մեր ողջ հայրենիքը դարձնելու ենք կրթական ինդուստրիայի կենտրոն: Սա է մեր միակ ուղին՝ հզորանալու, դեպի հաղթանակներ ձգտելու, կյանքի ճանապարհ կերտելու միակ բանաձևը:

Մենք հավատում ենք մեր գործին, մենք հավատում ենք հային, հայի կամքին, ոգու ուժին՝ ոտքի կանգնելու: Հանուն կյանքի ճանապարհի՝ գալիք Ամանորով թող վաղվա օրվա հավատն ու հույսը ամրապնդվի…

Գալիք Սուրբ Ծնունդով թող սեր տարածվի…

Թող 2023-ը միայն բարօրություն և խաղաղություն, հզորություն ու առողջություն բերի մեր հայրենիքին, մեր ընտանիքներին Հայաստանում, Արցախում և Սփյուռքում…

Սիրով՝ Աշոտ Ալիխանյան Շիրակացու ճեմարանի համայնք»