ԿԳՄՍ նախարարությունն արդեն երկրորդ տարին Արցախի Հանրապետության հռչակման  օրվան ընդառաջ դպրոցականների համար կազմակերպում է տոն օրվան  նվիրված շարադրությունների մրցույթ։ Օրը նշանավորելուց զատ, այն նպատակ ունի բացահայտելու երեխաների ստեղծագործական և վերլուծական կարողությունները և ոգևորելու շնորհալի երեխաներին։  Այս տարի  10-11-րդ դասարանների 18 աշակերտ է մասնակցել մրցույթին, որը կայացել է օգոստոսի 30-ին, մեկ փուլով։

Այսօր՝ սեպտեմբերի 6-ին, տեղի ունեցավ մրցույթի՝ բարձր միավորներ վաստակած և մրցանակային տեղեր զբաղեցրած մասնակիցների պարգևատրումը։

Մարտակերտի շրջանի Հաթերքի միջն․ դպրոցի 11-րդ դասարանցի Արփինե Խաչատրյանի շարադրությունը  լավագույնն է ճանաչվել։ Երկրորդ տեղում Ճարտարի N 1 դպրոցի աշակերտուհի Նարինե Այդինյանն է։ Իսկ երրորդ մրցանակային տեղին արժանացել է Շուշաննա Բալայանը՝ Ստեփանակերտի N 8 դպրոցից։

Հանձնաժողովի անդամ, պետական տեսուչ Գայանե Գրիգորյանը խոստովանում է՝ փորձել են հնարավորինս զգույշ մոտենալ  յուրաքանչյուր մասնակցի աշխատանքին՝ հասկանալով, որ ամենքը թղթի վրա թողել է իր սրտից մի նշույլ,  մի մասնիկ իր հոգուց։  «Լավ գիտակցեք, որ գրագիտությունը բոլոր ժամանակներում հաղթաթուղթ է ձեր ձեռքին։ Շարունակեք զարգացնել ձեր ստեղծագործական կարողությունները, կատարելագործեք  ձեր գիտելիքները»,-մասնակիցներին ուղղված խոսքում նշեց Գ․ Գրիգորյանը։

Մրցանակային տեղեր զբաղեցրած և ակտիվ մասնակցություն ցուցաբերած   դպրոցականները պարգևատրվել են նախարարության դիպլոմներով, պատվոգրերով և նվերներով։