Արցախյան պատերազմներում զոհված քաջարի մարտիկների կատարած սխրանքն անմահ պահելու, նրանց ոգով սերունդներին դաստիարակելու նպատակով  ԱՀ ԿԳՄՍ նախարարության աշխատակազմի երիտասարդության հարցերի բաժինը 2016 թվականից երիտասարդների մասնակցությամբ պարբերաբար իրականացնում է այցելություններ արցախյան պատերազմներում զոհված նահատակների շիրիմներին:  Ծրագիրը նպատակ ունի նաև երիտասարդության  մոտ ձևավորել պահանջատիրության զգացում, հպարտություն՝ Հայոց բանակի, նրա քաջարի որդիների կատարած սխրանքների հանդեպ, նրանց կիսատ թողած գործը շարունակելու և հայրենի երկրին տեր կանգնելու պատրաստակամություն: 

  «Ննջեք խաղաղությամբ, ձեր գործը շարունակում ենք» ծրագրի շրջանակում մայիսի 9-ին, 11-ին և 12-ին ԱՀ ԿԳՄՍ նախարարության աշխատակազմի երիտասարդության հարցերի բաժնի աշխատակիցները և մի խումբ երիտասարդներ  այցելել են Ստեփանակերտ, Մարտունի, Մարտակերտ և Ասկերան, հարգանքի տուրք մատուցել նահատակ հերոսների հիշատակին:

«Այսօրվա երիտասարդը պետք է քաջ գիտակցի, որ պարտավոր է արժանի սերունդ լինել, ծառայել հայրենիքին և իր վարքագծով ու կեցվածքով բարձր պահել հազարավոր մեր զոհերի հիշատակը: Մեր տղաների արյամբ շաղախված վիրավոր մայր հողի վրա պետք է պինդ կանգնենք և ապրելով Արցախում՝ ապրեցնենք Արցախը»,- իր խոսքում նշեց ԱՀ ԿԳՄՍ նախարարության երիտասարդության բաժնի գլխավոր մասնագետ Անուշ Ալեքսանյանը: