Արգո տիկին Սոնա Հովհաննիսյան,

ուղիղ 100 տարի առաջ այս օրերին մեծատաղանդ Ռոմանոս Մելիքյանը հիմնադրեց երաժշտական ստուդիա, որի հենքի վրա պիտի բարձրանար հայ ազգային մշակույթի գլխավոր խորհրդանիշը՝ Կոմիտասի անվան կոնսերվատորիան: Հենց սկզբից էլ մեծագույն երանություն էր յուրաքանչյուր հայերենասեր հայի համար տեսնելը, թե կոնսերվատորիան ինչպիսի նվիրվածությամբ է վերաբերում հայ երգի նահապետ Կոմիտասի անունը կրելու բացառիկ պատվին, այն նույն Կոմիտասի, որն ապացուցեց թերահավատ աշխարհին, որ հայն ունեցել է և ունի ազգային բազմահազարամյա մելոս, պարզապես անհրաժեշտ է փնտրել, չվհատվել, հետևողական լինել ու դարերի և նվաճողների ստեղծած արհեստական փոշու տակից հանել մեր անարատ ու անբիծ գանձերի Նարեկը՝ ազգային ու հրաշախորհուրդ երգարվեստը:Կոնսերվատորիան արդարացրեց առաջին հերթին հիմնադիրների ակնկալիքները՝ վերածվել ազգային մշակույթի հրաշալի դարբնոցի, որտեղ կկերտվեն մեր ինքնության լույսի սերմնացանները, հարատևության գաղափարի հմուտ ճարտարապետները: Եվ տարածվեցին անսպառ լույսերը Հայաստանում ու Հայաստանից դուրս: Կոնսերվատորիան բոլոր ժամանակներում հարազատ մոր պես վարվեց Արցախի տաղանդավոր պատանիների ու երիտասարդների կոփման, կատարելագործման և Արցախում հայ ազգային հարուստ երաժշտարվեստի գոհարները բարձր պահելու գործին, որոնք վերադարձան Արցախ՝ իրենց հետ բերելով կենսական լույսը: Սրտանց շնորհավորում ենք Ձեզ և բոլոր հայերիս մշակույթի Ալմա Մատերի մեկդարյա հոբելյանի առթիվ և մաղթում պրոֆեսորադասախոսական կազմին և ուսանողությանը հաջողություններ, անսպառ եռանդ ու ստեղծագործական նոր վերելքեր՝ ի շահ հայապահպանումի և հայակերտումի: